A primeira edición dos premios Semente recoñece o traballo investigador do Campus Auga
Xinzo de Limia foi o escenario este mércores pola tarde da entrega dos galardóns da primeira edición dos Premios Semente, creados para recoñecer as mellores iniciativas do sector agroalimentario en Galicia e destacar a colaboración entre o ámbito académico e o mundo rural. Nesta primeira edición, entre os premiados estiveron representantes da Universidade de Vigo, como o Campus Auga, un proxecto de especialización do campus de Ourense acreditado pola Xunta de Galicia, e a investigadora Laura Meno.
O evento, conducido por Xosé Antonio Touriñán, contou coa presenza de Francisco Javier Rodríguez, vicerreitor do campus de Ourense. O Campus Auga, cuxo labor se centra en áreas como a alimentación funcional, a agricultura e o medio ambiente, así como a xestión de augas termais, foi recoñecido na categoría de Compromiso Ambiental. O director do proxecto, Roberto Ignacio Fernández, foi o encargado de recoller o galardón.
Pola súa banda, a investigadora Laura Meno, integrante do Grupo de Investigación en Sistemas Agroambientais (GISA) e do Instituto de Agroecoloxía e Alimentación da Universidade de Vigo, foi premiada na categoría de Investigación Agraria. O seu traballo centrouse en mellorar a sustentabilidade dos cultivos, especialmente o da pataca, desenvolvendo diversas investigacións para optimizar este sector en A Limia. Na súa tese doutoral, defendida na Universidade de Vigo, afondou no estudo da alternariose, unha enfermidade fúnxica que, xunto co mildio, representa unha das principais ameazas para as e os agricultores.
Os Premios Semente son unha iniciativa do Concello de Xinzo de Limia e contan co respaldo das universidades galegas. O seu propósito é recoñecer a innovación, sustentabilidade e desenvolvemento no sector agroalimentario. Ademais da entrega de galardóns, a gala foi concibida como un espazo de encontro para todas aquelas persoas que traballan na transformación do agro en Galicia.