A provincia de Ourense despídese da Capitalidade de Montaña 2024
O Centro Cultural Marcos Valcárcel acolleu o acto no que se fixo oficial o nomeamento de Orcera e La Iruela, ambos na provincia de Xaén, como Capital Española das Montañas para o ano 2025, recollendo así a testemuña dos catro concellos da provincia de Ourense que ostentaron o título en 2024: Chandrexa de Queixa, Manzaneda, Trives e San Xoán de Río.
O acto, que estivo presidido polo presidente provincial, Luis Menor, contou coa participación do presidente da asociación, Miguel Gracia -que agradeceu a cooperación institucional provincial-, e varios alcaldes e membros da executiva de esMontañas, dos rexedores dos catro concellos ourensáns que compartiron a Capitalidade este ano e unha delegación xienense encabezada polo presidente da Deputación de Xaén, Francisco Reyes, e coa presenza dos alcaldes de Orcera e La Iruela, Juan Francisco Fernández López e Daniel Sánchez Cruz, respectivamente.
Foi o presidente da Deputación de Ourense, Luis Menor, o encargado de pechar o acto, valorando a importancia que supuxo esta distinción para os municipios de Chandrexa de Queixa, Manzaneda, A Pobra de Trives e San Xoán de Río, recalcando que “ser a Capitalidade de Montaña de España non só fíxonos gañar visibilidade e proxección, senón que sentou as bases para desenvolver proxectos, estudos e políticas para mellorar a vida e a economía nos nosos territorios de montaña”. De feito, profundou en que ostentar a Capitalidade de Montaña de España foi un gran paso para garantir o seu futuro, “posicionándose no campo turístico e poñendo en valor os seus recursos naturais, culturais e ambientais. A súa identidade como pobos de montaña, en definitiva”.
Ademais de agradecer á Asociación EsMontañas esta distinción, Luis Menor lembrou que a cooperación da Deputación de Ourense foi activa e firme con todo o que conlevou a Capitalidade de Montaña de España 2024 debido ao impacto positivo que supuxo para o territorio, tanto na proxección de todo canto ofrecen os municipios de Montaña da provincia de Ourense, como polas actividades divulgativas e de análises en profundidade que se desenvolveron durante este ano.
Cesión a Orcera e La Iruela
Por último, explicou a “inmensa honra” que supuxo para a provincia de Ourense esta capitalidade, “e agora hónranos ceder a súa testemuña a Orcera e La Iruela, ambos na provincia de Xaén, como Capital Española das Montañas para o ano 2025”.
“Desexo ao meu homólogo na Deputación de Xaén, Francisco Reyes, así como aos meus colegas alcaldes dos municipios Capital de Montaña 2025, Juan Francisco Fernández López e Daniel Sánchez Cruz, que sexa unha experiencia tan reconfortante, proveitosa e inesquecible para ambos os territorios xienenses como o foi para os nosos municipios de montaña na provincia de Ourense”, concluíu Menor.