A San Martiño 2025 pecha as inscricións con máis de 10.300 participantes
Ourense prepárase para vivir unha das súas citas deportivas máis emblemáticas coa 48ª Carreira Pedestre Popular do San Martiño, que se celebrará o domingo 9 de novembro cun trazado renovado de 10 quilómetros e saída ás 11.00 horas desde a Ponte do Milenio. A meta estará situada na Praza de Concepción Arenal, completando un circuíto homologado pola Real Federación Española de Atletismo.
A edición deste ano pechou este domingo as inscricións con 10.384 participantes, 3.502 corredores na proba absoluta e 4.904 inscritos entre as modalidades sub-18, sub-16, sub-14, sub-12 e sub-10, mentres que a carreira inclusiva contará con 1.978 participantes.
Aínda que o prazo de inscrición xa está pechado, as persoas que o desexen poden colaborar coa Asociación de Familiares de Enfermos de Alzheimer de Ourense (Afaor) mediante doazóns a través da pasarela de inscrición ou do Dorsal 0.
O novo percorrido, de carácter provisional debido ás obras na avenida de Portugal, será máis chan e rápido que en edicións anteriores, cunha recta final de preto de tres quilómetros. A carreira partirá da Ponte do Milenio e continuará polo barrio da Ponte, a rúa Xesús Pousa, a avenida de Marín, a Ponte Nova, a avenida Otero Pedrayo, o campus universitario, a rúa do Paseo, a Praza Maior, o Xardín do Posío, a rúa da Coruña, Nosa Señora da Saínza e a avenida de Zamora até a zona de Expourense. O regreso farase pola mesma avenida e a rúa do Progreso até a meta, situada na Praza de Concepción Arenal. A organización xa anunciou que deseñará un novo percorrido definitivo para a edición de 2026.