A San Silvestre de Ourense provocará cortes de tráfico e cambios nos autobuses durante este mércores
O Consello Municipal de Deportes do Concello de Ourense, en colaboración co Club Ourense Atletismo e a Federación Galega de Atletismo, organiza este mércores 31 de decembro a décima edición da “Carreira Popular San Silvestre Ourensá”, que contará con máis de 2.400 participantes inscritos.
Debido á celebración da proba, a Policía Local procederá a cortar o tráfico en todas as rúas que forman parte do percorrido desde as 15:00 horas e ata a finalización da carreira, prevista para a tarde. O itinerario da categoría absoluta, coa saída ás 16:30 horas, percorrerá desde a rúa do Paseo, pasando polo Parque de San Lázaro, Bedoya, Avenida de Bos Aires, Arturo Pérez Serantes, San Francisco, Lúa, Praza do Corrixidor, Praza dos Suaves, Praza do Trigo, Cardenal Cisneros, Hernán Cortés, Xulio Prieto Nespereira, Lugo, Vilar, Praza da Ferrería, Cervantes, Barreira, Praza Maior, Lamas Carvajal e concluirá no Paseo.
Estas restricións tamén afectarán ao transporte público urbano. A parada habitual de taxis no Parque de San Lázaro quedará inoperativa e trasladarase provisionalmente á rúa Xaquín Lorenzo “Xocas”. O Tren de Nadal iniciará o seu servizo máis tarde do habitual, ás 00:00 horas. Ademais, as liñas de autobús urbano experimentarán cambios nos seus percorridos: a liña 5 desviará a súa ruta pasando por Curros Enríquez, Celso Emilio Ferreiro e a Avenida de Bos Aires, mentres que as liñas 6 e 13 circularán por Curros Enríquez, Celso Emilio Ferreiro e Xoán de Novoa. En todos os casos, os autobuses utilizarán as paradas habituais que coincidan con estes traxectos alternativos.
O tráfico e o servizo de transporte público restableceranse con normalidade unha vez concluída a proba deportiva.