A Subdelegación do Goberno de Ourense destaca a redución da sinistralidade grazas ao radar de Gustei, en Coles
O subdelegado do Goberno en Ourense, Eladio Santos, fixo hoxe balance do décimo aniversario da posta en funcionamento do radar de tramo de Gustei, no concello de Coles, destacando a forte redución da sinistralidade nun dos puntos negros históricos da rede viaria ourensá.
Segundo os datos achegados, entre os anos 2015 e 2025 rexistrouse unha soa persoa falecida no tramo da N-525 comprendido entre os puntos quilométricos 242,2 e 246,0, así como dous feridos graves. Pola contra, na década anterior á instalación do dispositivo contabilizáranse nove falecementos e quince persoas feridas de gravidade, o que supón unha diminución da mortalidade próxima ao 90%.
Eladio Santos subliñou que este balance confirma a eficacia das medidas de control da velocidade impulsadas pola Dirección Xeral de Tráfico. “Os datos que arroxa este aniversario exemplifican que os radares serven para respectar os límites de velocidade, o que diminúe a gravidade dos accidentes e salva vidas”, afirmou o subdelegado do Goberno, quen engadiu que este tipo de actuacións “son medidas eficaces que teñen como fin salvar vidas”.
O radar de tramo de Gustei, situado na estrada nacional N-525 (Benavente–Santiago), foi o segundo deste tipo instalado en España nunha vía convencional. Ten unha lonxitude de 3.760 metros e un límite de velocidade fixado en 70 quilómetros por hora. Ademais, complétase cun radar fixo situado no punto quilométrico 244,850, no sentido contrario da circulación.
A pesar de que ambos dispositivos comezaron a sancionar infraccións en 2016, foron instalados o 1 de decembro de 2015, momento desde o cal os condutores xa percibían a súa presenza como un elemento disuasorio. A súa implantación viuse reforzada por melloras na infraestrutura, como o asfaltado da vía, a colocación de balizas laranxas e marcas sonoras, que contribuíron a incrementar a seguridade nun tramo que soporta unha intensidade media diaria de entre 5.500 e 7.000 vehículos.