A subdelegación do Goberno presentou en Maceda unha nova unidade móbil para a expedición do DNI
O subdelegado do Goberno en Ourense, Eladio Santos, participou en Maceda na presentación dunha unidade móbil da Policía Nacional para a expedición e renovación de DNI e pasaportes.
A Policía destinará un total de seis vehículos deste tipo a Galicia, os cales percorrerán 75 municipios carentes de comisaría, para prestar servizos de renovación e expedición de DNI e pasaportes entre os seus veciños, trámites que ata o momento non podían ser realizados fóra das dependencias policiais.
Agora, con esta unidade móbil os usuarios sairán en 10 minutos co seu novo documento identificativo, mentres que ata o momento era preciso un día para realizar a pegada dactilar nas localidade rurais, outro para a impresión nunha comisaría e un terceiro para facer entrega ao cidadán.
No caso da provincia de Ourense, este vehículo percorrerá os principais municipios, salvo aqueles que contan con oficina da Policía Nacional, como é o caso de Verín e O Barco.
Durante a presentación en Maceda, o subdelegado do Goberno en Ourense, Eladio Santos, fixo fincapé en que é unha mostra máis de que “a Administración Xeral do Estado está no rural”.
Trátase dunha iniciativa estatal que se suma ao programa “A Administración Preto de Ti”, no que funcionarios da Subdelegación do Goberno se trasladan ata os concellos de menos de 8.000 habitantes para a expedición do certificado dixital, así como os do INSS e o SEPE, para achegar á cidadanía os seus trámites máis habituais. Xunto á sesións informativas que a Subelegación está a realizar nas cabeceira de comarca para informar á poboación migrante das novidades do novo Regulamento de Estranxeiría.
Na presentación desta unidade móbil da Policía Nacional tamén estiveron presentes o comisario xefe provincial, Juan Cástor Vázquez, e a alcaldesa de Maceda, Uxía Oviedo.