A UVigo desenvolve en Ourense un proxecto para impulsar a accesibilidade cognitiva nos balnearios da provincia
Un equipo do Grupo de Estudos en Traballo Social: Investigación e Transferencia (Gets-it) da Universidade de Vigo está a desenvolver o proxecto Ourense TermalAcces, orientado a promover a accesibilidade cognitiva en balnearios ourensáns. Segundo os seus responsables, “este proxecto busca promover a participación real de persoas con discapacidade cognitiva no termalismo, aliñándose con marcos internacionais de dereitos”. A iniciativa conta co apoio das Axudas a grupos de investigación do campus de Ourense (Inou 2025), financiadas pola Deputación de Ourense ao abeiro dun convenio anual co centro académico.
Na recta final do proxecto, a Facultade de Educación e Traballo Social acolleu unha xornada na que María Dolores Portela, de Fademga-Plena Inclusión Galicia, abordou a diagnose da accesibilidade cognitiva nos balnearios da provincia. Na apertura, a decana Isabel Mociño deu os “parabéns a todo este equipo por este proxecto que vai directamente a unha das liñas prioritarias que temos no centro, que é ser un centro de referencia en atención á diversidade”. Iria Vázquez e Rubén González presentaron os obxectivos e a metodoloxía do estudo.
O proxecto céntrase en identificar e propoñer melloras para ampliar o acceso das persoas con discapacidade cognitiva aos establecementos termais do Programa de Termalismo Social da Deputación de Ourense, tradicionalmente orientado a persoas maiores. “Fai necesaria a inclusión de persoas con discapacidades cognitivas”, subliñan os promotores, que consideran que a accesibilidade cognitiva é “un dereito clave e aínda desatendido, a pesar da súa incidencia directa na participación social”. O traballo adopta unha perspectiva interseccional, tendo en conta variables como discapacidade, idade, xénero e territorio, e analiza “as barreiras invisibilizadas que enfrontan as persoas con discapacidade intelectual ou psicosocial en balnearios, desde o enfoque do deseño universal”.
A metodoloxía empregada combina entrevistas semiestruturadas, observación participante e diagnósticos realizados por Fademga, estruturando o proxecto en catro fases: revisión documental e deseño, traballo de campo, elaboración de propostas de mellora e difusión científica dos resultados.
O equipo de Ourense TermalAcces subliña que “a accesibilidade cognitiva é necesaria para garantir a autonomía e participación social de persoas con discapacidade intelectual e mental, así como de persoas maiores con deterioración cognitiva”, e destaca que o proxecto contribúe a situar Ourense como referente europeo en termalismo accesible, reforzando o turismo social, a inclusión e o envellecemento activo, e dinamizando o ámbito rural da provincia.