A UVigo organiza este sábado unha nova ruta cultural ás Fragas do Eume
O sábado 5 de abril, a Área de Benestar, Saúde e Deporte da Universidade de Vigo organizará unha nova ruta cultural, que será a novena deste curso académico. Neste ocasión, os participantes farán unha ruta polas Fragas do Eume e o Mosteiro de Caaveiro. A inscrición está aberta tanto á comunidade universitaria como á cidadanía en xeral. A saída dende Ourense será ás 8.00 horas dende o campus, á altura da cafetería Perla.
A andaina, cunha distancia de 15,5 quilómetros e dificultade media, levará aos asistentes a través dun dos bosques atlánticos mellor conservados de Europa, un verdadeiro paraíso de biodiversidade, onde se poderá disfrutar dunha vexetación densa e ríos de augas cristalinas. Segundo a organización, é "un espazo máxico onde a natureza e a historia se funden". Durante o percorrido, os participantes poderán visitar o Mosteiro de Caaveiro, "unha auténtica xoia medieval cunha historia de máis de mil anos, desde onde se gozan vistas impresionantes", así como a antiga Central de Ventureira, actualmente sen uso, pero que lembra a relevancia histórica da produción hidroeléctrica na zona.
As inscricións para cada ruta cultural realízanse a través do Campus Activo da UVigo e están abertas exclusivamente á comunidade universitaria ata o luns previo á andaina. Se quedan prazas dispoñibles, do martes ao xoves antes de cada ruta, tamén poderá inscribirse calquera persoa interesada. O prezo varía en función do colectivo ao que pertenza a persoa en relación coa Universidade de Vigo, sendo tamén abertas á participación de persoas externas á institución. Cada ruta, con duración dun día, acredita 7,5 horas ECTS. Habilitáronse autobuses para trasladar aos participantes desde os tres campus da universidade.