Afaor, a Fundación Dorzán e a UVigo colaboran na formación socioeducativa sobre o Alzhéimer
Este venres celebrouse no campus de Ourense o acto de clausura e entrega de diplomas do XIII Curso de Intervención Socioeducativa con Persoas Afectadas pola Enfermidade de Alzhéimer. A formación lévase a cabo cada ano académico na Facultade de Educación e Traballo Social grazas á colaboración entre a Asociación de Alzhéimer de Ourense-Afaor, responsable da actividade, a Fundación Dorzán e a Universidade de Vigo.
As vinte persoas inscritas, alumnado de diferentes cursos da mencionada facultade, adquiriron coñecementos sobre a enfermidade de Alzhéimer e demencias similares, os tratamentos farmacolóxicos, os recursos institucionais, o tratamento legal, o papel das familias nestas enfermidades ou a bioética, entre outros aspectos. Especialistas en cada unha das materias foron os encargados de impartir a docencia de 40 horas do curso, que despois se complementou coa realización de 20 horas de prácticas titorizadas por Afaor. Na clausura desta edición participaron Isabel Mociño, decana da Facultade de Educación e Traballo Social; Juan Ramón Álvarez, presidente da Fundación Dorzán, e Sara Ruíz, vicepresidenta de Afaor.