As Copas Deputación 2026 contarán cun orzamento total de 90.000 euros
A Deputación Provincial de Ourense destinará este ano un orzamento total de 90.000 euros para as Copas Deputación 2026, cuxas bases reguladoras veñen de ser publicadas no Boletín Oficial da Provincia (BOP).
A través desta convocatoria, que se integra no Plan Estratéxico de Subvencións da Deputación e do Inorde 2024-2027 e ten como finalidade garantir a continuidade de competicións cun forte arraigamento social e deportivo no territorio provincial, a institución provincial reforza o seu compromiso co deporte base e co deporte de competición federado, apoiando a organización de competicións deportivas amateur que se desenvolvan integramente na provincia de Ourense durante a tempada 2025-2026 baixo a denominación de “Copa Deputación”.
As bases, que poden ser consultadas no BOP así como na sede electrónica da Deputación, establecen que poderán ser beneficiarias as federacións deportivas galegas, a través das súas delegacións en Ourense, así como entidades deportivas da provincia autorizadas polas correspondentes federacións.
O prazo de presentación de solicitudes iniciarase tras a publicación da convocatoria na Base de Datos Nacional de Subvencións e permanecerá aberto ata o 16 de febreiro de 2026, debendo presentarse de forma telemática a través da sede electrónica da Deputación de Ourense.