As obras de mantemento no viaduto sobre a A-52 obrigarán a cortar o tráfico nun tramo da AG-53 a partir do luns
A partir do próximo luns 19 de xaneiro comezarán novas afeccións ao tráfico na autoestrada Dozón-Ourense (AG-53) debido ás obras de mantemento do viaduto que cruza a A-52. Estes traballos forman parte da segunda fase da intervención, que inclúe o izado do taboleiro do viaduto e a renovación e mellora dos apoios do taboleiro sobre as pilas.
Durante esta fase, que se prolongará entre 2 e 4 días laborables por cada un dos cinco apoios do viaduto, será necesario cortar por completo a calzada. Habilitaranse desviacións para os usuarios, cun primeiro corte previsto para o luns 19 de xaneiro. Segundo a planificación, estas interrupcións repetiranse aproximadamente cada dúas semanas, con cortes de 3 a 4 días de duración, ata que finalicen as obras na primavera.
Mentres duren os traballos, permanecerá pechado o carril da AG-53 entre o quilómetro 86,5 e a conexión coa A-52 e a OU-402. Ademais, instalarase a sinalización necesaria na AG-53, na AG-54 e no enlace de Maside para guiar aos condutores polas rutas alternativas desde Santiago e desde O Carballiño.
Recoméndase aos condutores extremar a precaución e seguir a sinalización para minimizar as molestias durante o período de obras.