As rutas culturais da UVigo achegaranse este sábado a Rianxo e o río Té
O Campus de Ourense da Universidade de Vigo propón para o sábado 29 de novembro a terceira ruta cultural deste curso académico, organizada pola Área de Benestar, Saúde e Deporte. A andaina, de dificultade media e 19 quilómetros, está aberta á comunidade universitaria con prioridade e tamén á cidadanía en xeral.
O roteiro circular comezará na praza de Castelao en Rianxo, continuando polo paseo marítimo á beira da ría. Desde alí, os participantes atravesarán o que a organización describe como “ese Rianxo literario ligado a Castelao e a tantos escritores e poetas que cantaron a ría”. A continuación realizarán a ruta ambiental do río Té, un tramo no que a paisaxe cambia do mar ao bosque de ribeira, cun acompañamento do son da auga e a sombra dos carballos e ameneiros. O regreso farase pola zona da Ermida de San Pedro e polos petróglifos dos Mouchos, que achegan un valor arqueolóxico ao percorrido.
Esta actividade é a terceira das rutas culturais que a UVigo programa este curso, tras a primeira que tivo lugar o 25 de outubro polos muíños do río Loña en Pereiro de Aguiar, en recordo a José García-Calvo Willy, antigo promotor destes roteiros. O ciclo finalizará o 13 de decembro coa Ruta de Marquino Largano en Nogueira de Ramuín.
As inscricións para persoas de fóra da comunidade universitaria está aberta ata ás 23:59 deste xoves.