As sirenas da Presa de Velle resoarán este mércores na capital ourensá
As probas de sirenas dos plans de emerxencia das presas de San Pedro, Os Peares e Velle, están a ter lugar durante esta semana. Concretamente, durante a xornada deste mércores, a partir das 13.00 horas, levaranse a cabo as probas de sirenas da presa de Velle. O seu son será percibido en diferentes zonas da cidade, mais a poboación non debe realizar ningunha acción especial cando as escoite e poderá continuar normalmente coas súas actividades.
As probas están enmarcadas nos plans de emerxencia das presas hidráulicas que se levan a cabo todos os anos, coa participación de Protección Civil da Subdelegación do Goberno en Ourense, Dirección Xeral de Emerxencias e Interior da Xunta de Galicia e a Confederación Hidrográfica do Miño-Sil.
Xa este martes, 25 de xuño, efectuáronse as probas das presas de San Pedro e Os Peares, que foron audibles principalmente en Velle (A Batundeira e San Mamede) e no Polígono das Coiñás, no Vinteún.