Baños de Molgas converterá a antiga escola municipal de Alvite nun centro social
A Xunta de Galicia e o Concello de Baños de Molgas asinaron este martes un convenio de colaboración para financiar a rehabilitación da antiga escola municipal de Alvite, un edificio actualmente en desuso que será transformado nun centro social para a comunidade.
A conselleira de Vivenda e Planificación de Infraestruturas, María Martínez Allegue, acompañada polo secretario xeral técnico, Yago Borrajo, subscribiu o acordo co alcalde, Manuel Ángel Fernández. A actuación será financiada a través dun préstamo sen xuros de 86.390,43 euros procedente do Fondo de Cooperación da Xunta, destinado a municipios con menos de 50.000 habitantes.
Grazas a este apoio económico, o Concello poderá acometer as obras necesarias para acondicionar o inmoble e adaptalo ao seu novo uso. O obxectivo é recuperar un edificio tradicional de titularidade municipal que se atopaba abandonado e poñelo ao servizo da cidadanía, con funcións comunitarias, sociais e culturais.
A intervención enmárcase na liña de axudas da Xunta destinada a financiar proxectos de conservación do patrimonio, rexeneración urbana ou adquisición e rehabilitación de inmobles en concellos de menor tamaño. O préstamo, pertencente á convocatoria de 2025 e dotado cun orzamento total de 3,7 millóns de euros, deberá devolverse nun prazo de oito anos.