Barbadás abre o prazo para presentar propostas e organizar as festas patronais da Valenzá en 2026
O Concello de Barbadás abriu o proceso para que as persoas interesadas poidan presentar propostas co obxectivo de asumir a organización das festas patronais da Valenzá en 2026. A decisión chega despois de que na edición de 2025 se presentasen dúas comisións veciñais e ante a previsión de que este ano volva haber varios aspirantes, polo que o goberno local elaborou un documento de bases con condicións mínimas para garantir o bo desenvolvemento dos festexos.
O prazo de presentación de solicitudes arrincou o 1 de xaneiro e remata o 31 de xaneiro. En canto ás datas, as bases recollen que, por tradición e para evitar coincidencias con outras celebracións do municipio, a festa se celebrará a fin de semana anterior ao 11 de xuño, festividade de San Bernabé. En 2026 correspondería aos días 5, 6 e 7 de xuño.
No apartado horario, establécese que as actuacións musicais serán en quenda de tarde e verbena o venres e o sábado, cun límite ata as 4.30, mentres que o domingo haberá música cun remate máximo ás 23.00. Ademais, o propio 11 de xuño está prevista unha celebración no pobo vello, con actuación musical, o tradicional 'baile da pataca' e un concurso de queimada para pechar a xornada, como moi tarde ás 22.30.
As condicións inclúen obrigas de coordinación coa feira (reparto do espazo, valados e sinalización) e tamén coa parroquia para a celebración de actos relixiosos, así como a instalación dun 'punto violeta' de información contra a violencia machista nun lugar visible durante as verbenas. A cartelería e os programas deberán incorporar nun lugar preferente os escudos e o material identificativo que indique o Concello, ademais de Policía Local e Protección Civil como colaboradores.
As bases tamén lembran que a organización implica permisos, documentación técnica e seguros de responsabilidade civil, xunto co cumprimento da normativa vixente. A ocupación de vía pública, a colocación de escenarios, barras e atraccións, posibles afeccións á mobilidade ou o uso de pirotecnia requirirán informes preceptivos e vinculantes de Policía Local e Protección Civil. Do mesmo xeito, a comisión deberá encargarse da balizaxe e sinalización circunstancial seguindo as instrucións destes servizos, e instalar baños portátiles en número suficiente tanto na zona das verbenas como na das atraccións.
As propostas presentadas serán analizadas por un comité de valoración presidido polo tenente de alcalde e integrado tamén polo secretario da corporación, persoal de Policía Local e Protección Civil, e representantes de Cultura e da Escola de Música. Entre os criterios que se poderán ter en conta figuran a calidade artística das actuacións, a programación familiar, a animación nas rúas, xogos populares, eventos deportivos e iniciativas que contribúan á dinamización social e á convivencia veciñal.