Barbadás presenta a Cavernícola Race no Congreso Nacional de OCR
Por segundo ano consecutivo, Diego López, coordinador do Servizo Municipal de Deportes de Barbadás, e Miguel Soto, presidente do Club OCR Cavernícola, estiveron en Madrid representando a Cavernícola Race Barbadás na cuarta edición do Congreso Nacional de OCR.
A organización anunciou que nos próximos días abriranse as inscricións para a VII edición desta carreira de obstáculos, que se celebrará o sábado 9 de maio de 2026. A Cavernícola Race é unha das probas máis destacadas do municipio, que cada tempada atrae a centos de deportistas.
Desde o Concello lembran que a apertura do prazo anunciarase a través das redes sociais e os canais habituais, e tamén recomendan seguir as novidades na web de AOCO España.
Nas súas últimas edicións, a carreira superou os 450 participantes, o que reflicte a súa popularidade e o impacto positivo que ten na dinamización de Barbadás.