As promesas do Judo déronse cita no Paco Paz na primeira fase da Copa Deputación de Judo 2025
Este sábado, 1 de marzo de 2025, desenvolveuse no Pazo Paco Paz a primeira xornada das tres que compoñen a Copa Deputación de Judo 2025, competición que reunirá en total a 180 participantes de toda a provincia na proba máis importante da tempada.
As categorías da copa van desde a de Chupetín -menos de 18 quilos- ata a xuvenil. Ademais, mantense a fusión das categorías Masculina e Feminina na categoría OPEN, aberta a competidores de ambos sexos. Nesta edición, participan judocas dos clubs da cidade, ademais das Escolas de Cambeo, Inmaculada, Allariz e Baños de Molgas.
A Copa, integramente patrocinada polo Servizo de Deportes da Deputación de Ourense e organizada pola Delegación Ourensá de Judo, é a competición máis importante a nivel provincial e o principal viveiro de novos xudocas, sendo a primeira experiencia competitiva para a gran maioría.
As vindeiras xornadas terán lugar os días 26 de abril e 28 de xuño. Todas elas serán puntuables para a clasificación final.
A de 2025 é a 41ª edición desta competición, unha das máis lonxevas da provincia, ideada polo Mestre 8º Dan de Xudo, Manuel Montero.