Deportes

Máis de 200 participantes reuníronse na primeira xornada desta cita de referencia no calendario deportivo da provincia

O pasado sábado, 7 de marzo, celebrouse no Pazo Paco Paz a primeira xornada da Copa Deputación de Judo 2026, a competición máis importante a nivel provincial, que reuniu a 200 participantes de distintos puntos de Ourense.

As categorías abranguen desde Chupetín (menos de 18 quilos) ata xuvenil, mantendo a fusión das categorías masculina e feminina na categoría OPEN, aberta a competidores de ambos sexos. Participaron xudocas de clubes da cidade, así como das escolas de Cambeo, Inmaculada e Baños de Molgas. Para moitos dos máis pequenos foi a súa primeira experiencia en competición, convertendo a xornada nun primeiro contacto co mundo competitivo do xudo.

A Copa, íntegramente patrocinada polo Servizo de Deportes da Deputación de Ourense e organizada pola Delegación Ourensá de Xudo, constitúe un importante viveiro de novos xudocas e a primeira experiencia competitiva para a maioría dos participantes. Este ano a competición desenvolverase en tres xornadas, todas puntuables, o que converte a asistencia nun factor clave para a clasificación final. A seguinte xornada está prevista para o 18 de abril.

Trátase da edición número 42 desta lonxeva competición de formación, ideada polo Mestre 8º Dan de Xudo Manuel Montero, consolidada como un dos referentes do xudo ourensán.