Comezan os traballos de restauración da icónica locomotora da Ponte
O Concello de Ourense puxo en marcha a restauración da locomotora a vapor do barrio de A Ponte, unha actuación que busca devolver a este emblemático símbolo ferroviario o seu aspecto orixinal e frear o deterioro causado por case medio século de exposición ao aire libre.
O alcalde, Gonzalo Pérez Jácome, presentou esta mañá o inicio dos traballos, que contan cun orzamento de licitación de 192.566,41 euros e un prazo de execución de catro meses. “Hoxe é un día sinalado para a cidade de Ourense, porque iniciamos a primeira actuación de calado que se vai facer nesta máquina de tren desde que se instalara aquí hai 49 anos”, destacou o rexedor.
No acto participaron tamén o concelleiro de Obras Públicas, Francisco Lorenzo; as concelleiras de Transporte Público, Ana Fernández, e de Asuntos Sociais, Tamara Silva; así como representantes das entidades implicadas no proxecto, entre eles o presidente da Asociación Europea de Ferroviarios, Carlos Abellán Ruiz, e Miguel Ángel Sinde, da empresa Reparaciones Sinde SL, encargada de executar os traballos. Arturo Antón, de Tipoloxías Estruturais en Madeira, Hormigón e Aceiro SL, será o responsable da asistencia técnica.
A locomotora 240-2072, de tipo mastodonte, foi fabricada en 1927 e cedida ao Concello polo Consello de Administración de RENFE para a súa exposición no barrio de A Ponte como homenaxe ao persoal ferroviario. Desde 1976, atópase instalada na rúa Xesús Pousa Rodríguez, fronte á estación de ferrocarril.
O proxecto impulsado polo Concello contempla diversas actuacións de restauración estrutural e estética que permitirán conservar a peza e manter viva a súa memoria como parte do patrimonio industrial e ferroviario de Ourense.