Completada a restauración do histórico cruceiro de San Francisco
O Concello de Ourense rematou a restauración do histórico cruceiro de pedra situado no complexo cultural de San Francisco. A peza recupera así o seu lugar tradicional, xunto á capela da Venerable Orde Terceira Franciscana, que na actualidade é utilizada polo Museo Arqueolóxico como sala de exposición permanente.
A intervención foi necesaria tras o dano causado por un vehículo, o que esixiu unha restauración especializada para recuperar, tratar e recolocar o cruceiro no seu emprazamento habitual.
Os traballos contaron cun investimento de 17.956,40 euros e incluiron a remodelación integral da contorna, orientada a mellorar a visibilidade do cruceiro e a previr futuros accidentes coma o sucedido.
O cruceiro, que non conta con representacións escultóricas do crucificado nin outras figuras, estivo situado en diferentes puntos da cidade, como a rúa da Estrela (tamén chamada Carreira dos Defuntos e Quebracús) no Centro Histórico, e na antiga estrada de Maceda, hoxe rúa Emilia Pardo Bazán.
Actualmente, atópase dentro do importante conxunto do cemiterio de San Francisco, declarado Ben de Interese Cultural no ano 2000, un lugar emblemático para Ourense ao que tamén pertence a citada capela da Venerable Orde Terceira Franciscana.
Esta actuación súmase a outras levadas a cabo recentemente polo Concello para o coidado e a posta en valor do patrimonio urbano, como a restauración dos farois da Torre de Ourense e dos emprazados no acceso á Alameda e a do cruceiro do Outo do Cumial.
Ademais, actualmente, estanse a levar a cabo intervencións de restauración na fonte de San Miguel de Canedo e nos lavadoiros de Cachaxúas e Ponte do Val, e proximamente inicaranse outras nos lavadoiros de Casardomato e Seixalbo.