Convocado o concurso de comparsas e carrozas do desfile do Entroido de Ourense 2025
O Concello de Ourense lanza unha nova convocatoria para o concurso de comparsas e carrozas que participarán no Desfile do domingo de Entroido, que se celebrará o 15 de febreiro. O certame repartirá un total de 25.000 euros en premios, coa intención de promover a participación nesta tradición popular tan importante na cidade.
A Xunta de Goberno Local aprobou hoxe as bases da convocatoria, e o prazo de inscrición abrirase mañá, 13 de xaneiro, permanecendo aberto ata o 10 de febreiro ás 14.00 horas. Poderán participar asociacións veciñais, culturais e xuvenís, grupos, colexios e outras agrupacións interesadas en formar parte deste evento festivo.
O alcalde, Gonzalo Jácome, destacou a aposta do Concello polo Entroido, lembrando que “o ano pasado aumentamos a contía dos premios, deu bo resultado e os mantemos para este ano. É o mellor desfile do Entroido de Galicia, o que máis público ten, o de máis calidade e o que ten mellores premios.” Recalcou tamén que Ourense está a situarse como referencia do Entroido no norte de España.
No que respecta á distribución dos premios, para comparsas con máis de 10 participantes, o primeiro premio ascende a 1.500 euros, seguido de 1.000 euros para o segundo, 800 para o terceiro e catro cuartos premios de 500 euros cada un. Para comparsas con menos de 10 integrantes, o único premio é de 500 euros.
En categoría especial, outorgaranse 500 euros á comparsa máis numerosa e outros 500 euros á máis enxeñosa. Pola súa banda, a mellor carroza recibirá un premio de 1.000 euros, valorando o deseño, execución e posta en escena.
Ademais, o Concello concederá axudas a todos os grupos que completen o desfile e non consigan premio, ata un máximo de 17.200 euros repartidos segundo o tamaño dos grupos e se son comparsas ou carrozas. Por exemplo, cada carroza sen premio recibirá 200 euros, mentres que as comparsas con entre 5 e 9 integrantes percibirán 100 euros, e aquelas con máis de 50 compoñentes recibirán 400 euros.
As bases e o formulario de inscrición están dispoñibles na web do Concello. As inscricións poderán realizarse a través do Rexistro Xeral ou da sede electrónica, sendo esta última a vía para asociacións e entidades.