Deportes

Unha delegación composta por once judocas das categorías cadete e infantil loitará por acadar medallas

Integrantes do Judo Club Marbel

Este sábado, 5 de abril de 2025, desenvolverase no Pavillón Municipal de Lugo a fase final do Campionato Escolar de Judo nas categorías Infantil e Cadete. As competicións están organizadas pola Federación Galega de Judo e patrocinadas pola Secretaría Xeral para o Deporte da Xunta de Galicia.

Esta competición reunirá centos de judocas galegos destas categorías, os nados entre 2011 e 2012 (Infantil) e entre 2008 e 2010 (Cadete), entre os que se atopan once ourensáns do Club Marbel. Na categoría cadete competirán Aarón Rodríguez Rodríguez (-73 quilos), Daniel Ferreiro Ferreiro (-60), Dafne Gómez Zurita (-52), Gabriela Da Silva González (-70), Henar Pérez García (-48) e Lucía Caneiro Basalo (-48), mentres que en infantil os representantes do Marbel serán Elio Estévez López (-66), Adriano Verdeal Da Silva (-38), Carla Seone Laso (-40), Antía López Teixeira (-59) e Elena Domínguez Pliego (+63).

O equipo do Marbel estará dirixido no tatami polos mestres Felipe Iglesias e Ana Fernández, ademais de contar co mestre Manuel Montero. O obxectivo é practicar o mellor judo posible e competir ante o mellor da comunidade. Na pasada tempada, lembran dende o club, Dafne e Gabriela acadaron dúas medallas de bronce e Elio un cuarto posto.