Actualidade

Piden que o proxecto da A-76 "deixe de ser postergado e se converta nunha realidade tanxible en 2025"

Deputados do PPdeOU

Os deputados do Partido Popular de Ourense e León reactivaron as súas iniciativas para esixir ao Goberno de Pedro Sánchez que cumpra coa execución dos tramos da autovía A-76, que conectará O Barco de Valdeorras con Ponferrada. Celso Delgado, Ana Vázquez, Rosa Quintana, Ester Muñoz e Silvia Franco, representantes de ambas provincias, instaron o Executivo a licitar o primeiro tramo en 2025 e avanzar nos proxectos pendentes.

Os parlamentarios criticaron o atraso acumulado nesta infraestrutura, a pesar das reiteradas demandas dos habitantes de Valdeorras e do Bierzo. Desde 2018, tres ministros dirixiron a carteira de Transportes sen que se licitase ningún tramo desta autovía, segundo os deputados. Ademais, sinalan que compromisos previos de licitación para finais de 2023 e 2024 non se cumpriron.

Preguntas ao Goberno

O pasado 14 de xaneiro, os cinco deputados rexistraron no Congreso unha serie de preguntas para esixir respostas claras sobre o futuro da A-76. Entre as cuestións plantexadas inclúese o tramo entre Vilamartín da Abadía e Requeixo, para o que o PP solicita información sobre:

• Os motivos do incumprimento das datas comprometidas para a licitación.
• A data exacta na que se aprobará o proxecto de construción e a licitación das obras en 2025.
• A inclusión de partidas orzamentarias suficientes nos próximos Orzamentos Xerais do Estado.

Para o tramo entre Requeixo e A Veiga de Cascallá, os deputados cuestionan a modificación de contratos para a redacción do proxecto, que leva máis de cinco anos de atraso, e solicitan unha data concreta para a súa aprobación.

Finalmente, sobre o tramo entre A Veiga de Cascallá e O Barco de Valdeorras, o PP reclama explicacións polos máis de sete anos de demora desde a aprobación do proxecto de trazado, ademais de esixir que se liciten as obras en 2025.

Críticas á xestión do Goberno

Os deputados populares cualificaron a xestión do Executivo nesta materia como un "desprezo" aos habitantes de Valdeorras e do Bierzo, que levan anos agardando melloras nas infraestruturas viarias. Aseguran que seguirán presionando para que o proxecto da A-76 "deixe de ser postergado e se converta nunha realidade tanxible en 2025".