Eladio Santos destaca a inversión millonaria do Goberno central para o desenvolvemento urbano de Ourense
O subdelegado do Goberno en Ourense, Eladio Santos, reafirmou hoxe o compromiso do Executivo coa cidade, destacando a “inversión transformadora de 9 millóns de euros que supondrá un punto de inflexión no desenvolvemento urbano”. Así o indicou durante a presentación do proxecto 'Ourense Verde e Conectado', executado polo Concello de Ourense e financiado pola Vicepresidencia Primeira e o Ministerio de Facenda.
Acompañado polo alcalde, Gonzalo Pérez Jácome, e o concelleiro de Obras Públicas e Infraestruturas, Francisco Lorenzo, Santos explicou que esta iniciativa forma parte do Plan EDIL, enmarcado no Fondo Europeo de Desenvolvemento Rexional (FEDER) 2021-2027, destinado a apoiar ás Entidades Locais na transformación urbana sostible. Segundo o subdelegado, o obxectivo é ofrecer “máis recursos para mellorar a vida dos habitantes de Ourense, cun reforzo do papel esencial da Administración Local como motor de desenvolvemento e social”.
Santos salientou que os criterios desta convocatoria foron desenvolvidos pola Dirección Xeral de Fondos Europeos do Ministerio de Facenda para promover proxectos con impacto ambiental, económico e social. “Unha vez máis, queda claro que Administración está comprometida coa modernización dos barrios e a inversión en todo o territorio nacional, sen discriminación”, engadiu.
O Plan de Actuación Integrado do Concello de Ourense, 'Ourense Verde e Conectado', conta cun orzamento total próximo aos 20 millóns de euros e inclúe actuacións como a humanización de rúas emblemáticas, a mellora da mobilidade vertical en distintos puntos da cidade, a renaturalización de espazos urbanos e programas de gobernanza e cohesión social, así como iniciativas orientadas a converter barrios e rúas en contornos máis sostibles e accesibles para os cidadáns.
A nivel provincial, o pasado 3 de outubro o Ministerio de Facenda publicou a resolución provisional de asignación de fondos FEDER, que distribúe case 1.775 millóns de euros en toda España, dos cales Galicia recibe case 174 millóns. En Ourense aprobáronse catro plans que suman 22 millóns de euros. O Concello da cidade atópase na categoría de grandes cidades cunha asignación de máis de 8,7 millóns, mentres que outras tres asociacións de municipios obtén máis de 4,3 millóns cada unha, incluíndo localidades como Barbadás, San Cibrao das Viñas, O Pereiro de Aguiar, Barco, A Rúa, Verín e outros municipios da provincia.
As subvencións do Plan EDIL (Estratexia de Desenvolvemento Local Integrado) contan cunha dotación un 30 % superior á das convocatorias anteriores de EDUSI e aumentaron un 40 % no número de proxectos seleccionados, pasando de 173 a 242 iniciativas. A resolución tivo en conta a planificación integrada, a capacidade transformadora dos proxectos, a gobernanza, a participación, a viabilidade e a complementariedade con outros programas, asegurando que os fondos se destinen a iniciativas que promovan un desenvolvemento urbano sostible nos municipios.