Eladio Santos fai un chamamento a toda a sociedade para avanzar na loita contra a violencia machista
O subdelegado do Goberno en Ourense, Eladio Santos, fixo un chamamento á “necesidade de concienciación e unidade” para que a loita contra a violencia machista sexa realmente efectiva. Durante o acto institucional con motivo do 25N, Día Internacional da Eliminación da Violencia contra as Mulleres, celebrado ante a Subdelegación do Goberno, Santos lembrou que “estamos ante unha lacra que este ano se cobrou en España 38 vidas”.
Na lectura do manifesto oficial, o subdelegado destacou que “ningún discurso negacionista, nin interese partidista debe estar por enriba da loita contra unha violencia que suma cada día dor e inxustiza e que nos avergoña como sociedade”. “Non podemos permitir barreiras ideolóxicas nin políticas que freen esta loita común contra a violencia machista, porque hai vidas en risco”, engadiu.
Santos valorou os avances logrados grazas á Lei Orgánica 1/2004 de Medidas de Protección Integral contra a Violencia de Xénero, “un texto pioneiro que destaca polo seu enfoque integral e que mobilizou recursos en ámbitos diversos como a educación, a sanidade, o emprego, a xustiza e os servizos sociais”. Tamén destacou a renovación en 2025 do Pacto de Estado contra a Violencia de Xénero, que incorpora novas formas de violencia como a vicaria, dixital e económica, e lembrou a importancia da Lei Orgánica 10/2022 que implantou os Centros de Crise 24 horas en todas as provincias.
Por último, apelou a toda a sociedade, “desde as familias ata os centros educativos, para transformar comportamentos e estruturas socioculturais”. “Por todas as mulleres que deron o paso e por todas as que aínda non puideron facelo, non mires para outro lado”, sentenciou.
O evento estivo presentado por María Alida Iglesias, xefa da Unidade contra a Violencia sobre a Muller da Subdelegación do Goberno en Ourense, e incluiu un recital de poesía a cargo do Círculo Poético Ourensán e unha actuación musical do dúo Lorena e María.
A programación do 25N continúa o xoves 27 de novembro no Liceo de Ourense cunha xornada formativa. A maxistrada do Xulgado de Instrución número 3 de Santiago de Compostela, especializada en violencia sobre a muller, Paz Filgueira, ofrecerá a conferencia titulada “Retos na loita contra a Violencia de Xénero. Especial referencia a menores. Balance sobre protección de muller e menores”. Posteriormente, terá lugar a mesa redonda “Tipos de violencias sexuais. ONVIOS. Protocolos de intervención e seguridade a vítimas de violencias sexuais. Centro de Crise 24”, coa participación de Carlos Vázquez, inspector xefe da UFAM da Policía Nacional; Luis Ángel Veloso, sarxento xefe da Policía Xudicial da Garda Civil; e Nuria Fernández, coordinadora do Centro de Crise 24 horas.