En marcha a primeira fase das obras entre Rairo e o Cumial
A Deputación de Ourense investirá preto de 300.000 euros na estrada provincial que comunica Rairo (OU-0513) coa estrada autonómica do Cumial (OU-105) para a construción de novas beirarrúas e a renovación do firme.
As obras divídense en dúas fases. A primeira delas, xa en marcha, consiste na construción de beirarrúas na zona urbana da estrada provincial, partindo da glorieta situada ao remate da rúa Ramón Puga, xa na nova urbanización de Barrocás, o que redundará nunha maior comodidade dos residentes.
Nunha segunda fase, que se prevé executar a partir do verán, acometerase a renovación do firme nesta estrada provincial. Os traballos afectarán a un tramo de 2,5 quilómetros, consistirán no fresado do aglomerado actual e a reposición do firme.
As obras suporán unha notable mellora da seguridade tanto para os peóns como para o tráfico, ao circular por un trazado máis seguro.