Deportes

O conxunto ourensán logrou un total de 8 medallas, das cales sete foron en categorías femininas

O recinto feiral de Expourense volveu acoller o Campionato Galego Absoluto de Pista Curta, unha cita na que o Club Ourense Atletismo conseguiu uns excelentes resultados ao sumar un total de oito medallas.

Os títulos chegaron en catro disciplinas. Miguel Carbajales impúxose na pértega cun mellor salto de 4,76 metros, unha marca que lle permitiu aventaxar con claridade ao segundo clasificado. Tamén acadou o ouro Iria Solera no salto de altura, onde superou o listón en 1,70 metros despois de necesitar tres intentos para franquear o 1,66.

Na pértega feminina, Manuela Blanco proclamouse campioa tras asegurar primeiro a vitoria cun salto válido en 3,65 e confirmar despois o seu triunfo ao superar os 3,80 metros. Pola súa banda, Alba Martínez fíxose co ouro en triplo salto grazas a un rexistro de 12,09 metros, suficiente para abrir unha ampla diferenza respecto ás súas rivais.

O medalleiro completouse con dúas pratas: a de Irma Veiguela nos 800 metros, con un tempo de 2:14.98, e a de Aitana Capeáns no lanzamento de peso, onde acadou os 12,55 metros.

As medallas de bronce foron para Aroa Muñoz, terceira nos 400 metros cun crono de 57,47, e para Rebeca Fernández, que logrou 3,20 metros na pértega.