Deportes

Máis de 100 rapaces e rapazas déronse cita no Pavillón Municipal, que contou coa visita especial de Sean McDonnell, xogador do COB

Pereiro de Aguiar celebrou durante esta Semana Santa o I Torneo de Minibasket e Basket, unha xornada deportiva que contou cun gran éxito de participación, reunindo a máis de 100 rapaces e rapazas no Pavillón Municipal. A actividade converteuse nun punto de encontro para o deporte base, cun ambiente marcado pola participación, o esforzo e a ilusión dos máis novos.

A iniciativa “Ticalle o Basket” destacou polo seu bo nivel de participación e polo compromiso amosado por xogadores e xogadoras ao longo de toda a xornada, consolidándose como unha proposta orientada a fomentar a práctica deportiva desde idades temperás.

Na entrega de premios contouse cunha visita especial, a do xogador do Club Ourense Baloncesto (COB) Sean McDonnell, quen participou no acto e acompañou aos rapaces e rapazas nun momento especialmente significativo para todos os asistentes.