Jácome reúnese en Madrid co embaixador de China en España, Yao Jing
O alcalde de Ourense, Gonzalo Pérez Jácome, mantivo este venres un encontro en Madrid co embaixador de China en España, Yao Jing, co obxectivo de fortalecer as relacións bilaterais e explorar oportunidades de colaboración e investimento na rexión.
Durante a reunión, celebrada na Embaixada de China, ambas as autoridades intercambiaron impresións e manifestaron a súa máxima disposición para establecer sinerxías que beneficien a ambos os territorios. Pérez Jácome destacou durante o encontro as potencialidades de Ourense en sectores clave como a agroindustria, con empresas destacadas como Coren, o sector téxtil de alta gama, a industria da automoción, o potencial agrogandeiro, a xeotermia ou o termalismo.
Esta iniciativa, explican os responsables municipais, enmárcase na estratexia do Concello de Ourense para atraer investimentos estranxeiros e promover o desenvolvemento económico da cidade, posicionándoa como un destino atractivo para empresas e investidores internacionais.
O alcalde subliñou a importancia de establecer lazos de cooperación con China, considerando o crecemento económico e a proxección internacional do país asiático. Así mesmo, expresou a súa confianza en que este encontro sexa o punto de partida para futuras colaboracións que impulsen o progreso e benestar da comunidade ourensá.
Pola súa banda, o embaixador Yao Jing, sinalan desde o Concello, valorou positivamente a reunión e mostrou interese polas oportunidades que ofrece Ourense, comprometéndose a facilitar o achegamento entre empresarios chineses e a rexión galega para explorar proxectos conxuntos nos sectores mencionados.