Justin Quiles, segundo confirmado para as Festas de Ourense de 2025
As Festas de Ourense 2025 celebraranse do 18 ao 22 de xuño, coincidindo co remate do curso escolar, e contarán cunha nova ubicación. Terán lugar, segundo anunciou o alcalde de Ourense, Gonzalo Pérez Jácome, na zona do Pavillón dos Remedios, na rúa Pardo de Cela. Deste xeito, as festas abandonan o seu emprazamento tradicional, que sempre foi a céntrica Alameda de Ourense.
En canto ao programa, o alcalde anunciou a través das súas redes sociais que o cantante Justin Quiles será o encargado de actuar na noite do sábado, 21 de xuño. Pola súa banda, o coñecido cantante Nil Moliner dará un concerto o venres. Ambos actuarán na Avenida Pardo de Cela.
Por agora, descoñécese cal será o programa completo e a localización exacta e definitiva de todas as actividades. O propio alcalde recoñeceu hai uns meses que o formato utilizado o ano pasado, con actos fragmentados en distintos espazos, non convencía nin aos asistentes nin aos comerciantes. Por iso, a nova ubicación podería poñer fin a esta problemática, ademais de dar cumprimento á nova normativa de mobilidade, que impide o uso de determinadas rúas para este tipo de eventos por ser demasiado estreitas.