Literatura, escritura antiga e ciencia déronse cita nas rúas de Ourense
Centos de persoas déronse cita nas rúas e bares e Ourense co gallo da Noite Galega das Persoas Investigadoras. Coordinada pola Universidade de Vigo, a G-Night volveu sacar a ciencia dos laboratorios e das aulas achegándoa a nenas e nenos e persoas adultas que, baixo o lema Conciencias creativas, sumáronse nas principais cidades galegas á Noite Europea das Persoas Investigadoras, un proxecto de divulgación científica promovido pola Comisión Europea, que se desenvolve simultaneamente en case 400 cidades europeas dende 2005.
En Ourense a Facultade de Historia acolleu obradoiros sobre linguas da antigüidade nos que as persoas participantes recrearon as escritas antigas da man do grupo de investigación GEAAT. Pola súa banda, o Café & Pop Torgal acolleu dúas charlas científicas: Aprendizaxe baseada en xogos e o colectivo transxénero, a cargo de Paula Rodríguez, do Departamento de Análises e Intervención Psicosociocioeducativa e A ciencia axuda a reducir a violencia de xénero, a cargo de María José Vázquez do Grupo de Psicoloxía Xurídica e da Saúde: convivencia e benestar e Jennifer Rodríguez, traballadora social.