Luz verde ambiental ao proxecto de construción dunha planta de valorización de residuos non perigosos en Celanova
Xunta de Galicia concedeu autorización ambiental ao proxecto dunha planta de valorización de residuos non perigosos procedentes do sector da construción e demolición (RCD) no concello ourensán de Celanova.
Segundo o informe de impacto ambiental elaborado pola Consellería de Medio Ambiente e Cambio Climático, a instalación non se prevé que teña efectos adversos significativos sobre o entorno, sempre que se cumpran os condicionantes fixados tanto no propio documento ambiental como na resolución autonómica.
A futura planta centrará a súa actividade na clasificación, limpeza e valorización dos materiais desbotados para transformalos en áridos reutilizables. O proxecto pasou polo procedemento de avaliación de impacto ambiental simplificada, no que se someteu a documentación á participación pública e se consultaron nove organismos especializados, sen que se recibisen alegacións.
Segundo informan dende o Goberno galego, o informe e as consultas realizadas determinaron que a instalación sería viable sempre que se respecten criterios relacionados coa protección da saúde da poboación, a conservación de augas e ecosistemas, a salvagarda do patrimonio cultural, a integración paisaxística e a correcta xestión de residuos.
A resolución, que non exime ao promotor da necesidade de obter permisos e autorizacións adicionais, será publicada proximamente no Diario Oficial de Galicia e na páxina web da Consellería de Medio Ambiente e Cambio Climático.