Universidade

A xornada foi a primeira de varias programadas, con novas sesións previstas os días 13 e 14 de xaneiro, que reunirán a case 550 estudantes de varios institutos da rexión

O campus de Ourense celebrou esta semana a súa primeira xornada de portas abertas do curso académico, reunindo a máis de 200 estudantes de Bacharelato de diferentes centros educativos da provincia e arredores. A iniciativa, organizada pola Vicerreitoría do Campus de Ourense co apoio da Vicerreitoría de Estudantado e Empregabilidade da Universidade de Vigo, buscou achegar aos mozos e mozas ás titulacións, instalacións e oportunidades que ofrece o campus para o seu futuro universitario.

Durante a xornada, os estudantes puideron elixir entre itinerarios centrados nas áreas xurídico-sociais, humanidades e artes, ou en ciencias e enxeñaría, visitando facultades, escolas, laboratorios e espazos como o Campus Auga. Ademais, tiveron a oportunidade de coñecer o traballo de investigación que se desenvolve en diferentes ámbitos, como a intelixencia artificial ou a arqueoloxía.

O vicerreitor Francisco Javier Rodríguez destacou o crecemento do campus, a alta satisfacción do alumnado e a gran empregabilidade das súas titulacións, invitando aos estudantes a apostar por Ourense para a súa formación superior.

A xornada foi a primeira de varias programadas, con novas sesións previstas os días 13 e 14 de xaneiro, que reunirán a case 550 estudantes de varios institutos da rexión. O primeiro deses días achegaranse case 300 estudantes dos IES Lagoa de Antela (Xinzo de Limia), IES de Allariz, CPR Seminario Menor Diocesano A Inmaculada, IES Celanova Celso Emilio Ferreiro e IES Plurilingüe Pintor Colmeiro (Silleda). O segundo día será a quenda de arredor de 250 rapaces e rapazas do IES Xesús Taboada Chivite (Verín), IES Carlos Casares (Viana do Bolo), Centro Privado Plurilingüe Santa Teresa de Jesús e IES Eduardo Blanco Amor. Xa avanzado o curso haberá varias sesións máis.