Menor defende o termalismo como motor de saúde, emprego e cohesión territorial
O presidente da Deputación de Ourense e da Sección de Vilas Termais da FEMP, Luis Menor, defendeu o termalismo como un eixo estratéxico de saúde, emprego e cohesión territorial durante a reunión do Consello de Goberno desta rede, celebrada no Balneario Vichy Catalán de Caldes de Malavella (Xirona).
Na súa intervención, Menor subliñou o peso que acadou a Rede de Vilas Termais no conxunto do Estado, que inicia 2026 “nun momento de crecemento e consolidación”, con 76 entidades locais adheridas e unha representación de máis de 3,6 millóns de cidadáns. Neste contexto, salientou que a rede vai máis alá dunha estrutura administrativa e que constitúe “unha ferramenta ao servizo da economía dos coidados e unha oportunidade real para o mundo rural”.
O presidente provincial apostou por reforzar a proxección do sector coa apertura da rede a socios colaboradores e observadores, avanzando cara a un modelo de cooperación público-privada que permita consolidar o posicionamento estratéxico do termalismo. Tamén puxo o acento na necesidade de establecer alianzas con outras redes da FEMP e con organismos como o IMSERSO, co obxectivo de estender os beneficios do termalismo a todo o territorio e favorecer o envellecemento activo.
Durante a reunión, Menor fixo referencia aos avances en dixitalización e modernización, destacando a continuidade do Proxecto de Experiencias grazas a unha nova subvención de 100.000 euros vinculada ao Real Decreto 1087/2025. Neste sentido, sinalou que a rede avanza cara a “un modelo de xestión máis innovador, centrado na experiencia do usuario e na construción dunha marca sólida”.
No relativo á seguridade xurídica do sector, o presidente incidiu na importancia do Grupo de Traballo Xurídico-Técnico para avanzar cara a unha normativa estatal coherente e actualizada que achegue estabilidade e recoñecemento ao termalismo.
No plano organizativo, anunciouse que a vindeira reunión do Consello de Goberno se celebrará en Alange (Badaxoz) e que a XIX Asemblea Xeral da Rede terá lugar en Archena (Murcia) en 2026, agradecendo o interese e o nivel das candidaturas presentadas por outras vilas termais.
Menor defendeu que o termalismo “debe ser considerado unha cuestión de Estado”, integrada nas políticas públicas de saúde e de reto demográfico. Neste sentido, afirmou que “o termalismo é emprego non deslocalizable; onde hai un manancial, hai unha oportunidade de vida” e subliñou que “cada euro investido en termalismo non é un gasto, é unha inversión en saúde para os nosos maiores, en emprego para a mocidade e en futuro para os concellos”, reivindicando que as Vilas Termais “non son pobos con auga, senón auténticos destinos de vida”.