Nove jiujitsukas do Marbel representan a Ourense no Open Internacional de Roma
Nove jiujitsukas do Jiu Jitsu Club Marbel participarán no Open Internacional de Roma 2025, unha competición incluída no circuíto internacional que se celebrará do 13 ao 15 de xuño na capital italiana. Os deportistas competirán en diferentes categorías, desde sénior ata sub-12.
Tres deles farano nas modalidades de Loita e Ne Waza, centrada no combate en chan. Guillermo Arenas competirá na categoría sénior de menos de 69 quilos, Leire Carrera farao na sub-21 de menos de 57 quilos, mentres que Rubén Córdoba participará en menos de 94 quilos. Córdoba converterase así no sétimo membro do club ourensán en disputar un campionato internacional oficial. Pola súa parte, Arenas e Carrera xa contan con experiencia en europeos e mundiais. Carrera, que chega á cita completamente recuperada dunha lesión, logrou no pasado Open de Xénova, celebrado en xaneiro, dúas medallas: unha de prata e outra de bronce.
Nas modalidades de Dúo Clásico e Show, o Marbel tamén estará representado por tres parellas que competirán nas categorías sub-12, sub-16 e sub-18. Para este grupo será a súa primeira experiencia internacional, despois do bo rendemento amosado no Open Infantil de Castelló.
Felipe Iglesias, seleccionador galego e subcampión mundial, será o adestrador que acompañe ao equipo nesta cita. Iglesias destaca o talento, a motivación e o compromiso dos seus pupilos en cada adestramento. Segundo explica, para os debutantes o obxectivo é competir e medirse cos mellores do mundo, mentres que para os máis experimentados a meta será seguir mellorando no control mental e na estratexia durante o combate. Non se descarta a posibilidade de acadar algunha medalla.
O torneo celebrarase no Centro Olímpico Matteo Pellicone, situado no distrito de Ostia, unha zona costeira a carón do mar Tirreno con máis de 90.000 habitantes. O recinto, inaugurado en 1992 para o Mundial de Loita Libre e reformado en 2012, ten capacidade para 1.500 espectadores e é a sede da Federación Italiana de Judo e Karate. Ademais, alberga un museo de deportes de combate único en Europa e é recoñecido pola súa singular arquitectura con forma de sombreiro de samurái.