O barrio da Ponte prepárase para festexar o Día Grande do Entroido de Frei Canedo
Este luns 3 de marzo o barrio pontino celebra, un ano máis, o día grande do Entroido de Frei Canedo. Os festexos comezaron xa pola mañá cun pasarrúas a cargo de Aperta Percusión, que acompañou a Frei Canedo no seu percorrido polas rúas e negocios do barrio.
Pola tarde, a partir das 18.30 horas, terá lugar a xuntanza de cofrades e cofradesas arredor da capela. A partir das 19.30 horas, comezarán os solemnes actos, que incluirán o bautizo dos novos cofrades, a bendición da súa santidade, a entrega dos premios do concurso de escaparates e do cartel e a purificación do "potafumeiro".O prato forte da xornada será o pregón, que este ano correrá a cargo de Cañita Brava. Como novidade, o pregón trasládase á entrada da Ponte Romana.
A partir das 20.15 horas, dará comezo a solemne procesión de Frei Canedo, onde se agarda unha gran presenza de comparsas. Como cada ano, estas participarán nun concurso para elixir as tres mellores, un evento que segue medrando en participación e que congrega a milleiros de persoas nas rúas do percorrido: Ribeira de Canedo, Avenida das Caldas, Xesús Pousa, Rúa San Froilán e novamente a Avenida das Caldas.
Tralo desfile, haberá música na carpa e, a partir das 23.00 horas, a actuación da Orquestra Galilea. Á medianoite, lanzarase o tradicional folión de fogos de artificio, seguido do sorteo das rifas. A noite rematará cunha nova actuación da Orquestra Galilea.