O BNG critica os atrasos no pagamento das subvencións ás entidades do terceiro sector por parte do Concello de Ourense
O Grupo municipal do BNG valorou positivamente que, tras anos de espera, as entidades do terceiro sector finalmente vaian recibir as subvencións pendentes correspondentes a 2022. “Por fin as entidades, ás que por culpa dunha neglixente planificación orzamentaria do Goberno local de DO se lles negou durante anos a subvención á que tiñan dereito, van finalmente a recibir os cartos”, sinala a concelleira nacionalista, Rhut Reza.
A edil recordou que en 2026 “van cobrar aquela subvención do ano 2022 que o Goberno de Democracia Ourensana lles negou” e subliña que desde o BNG levan desde ese mesmo ano denunciando o que consideran unha “inxustiza” e achacan esta situación á “falta de planificación” do executivo de Pérez Jácome.
Porén, Reza advirte que a situación podería repetirse coas subvencións de 2023 e 2024. Segundo explica a concelleira, “onte mesmo se publicaron no BOP os decretos finais de decembro relativos ás axudas para esas convocatorias, destinadas a entidades que quedaron inicialmente fóra por falta de crédito”. Por iso, expresou a súa esperanza de que “desta volta, en canto as entidades presenten a documentación xustificativa no prazo dun mes, o Goberno local actúe con maior rapidez e as axudas se aboen sen que teñan que agardar anos, como ocorreu en 2022”.