O BNG de Ourense pide blindar as prazas de profesorado de chinés na Escola Oficial de Idiomas de Ourense
A deputada nacionalista por Ourense, Noa Presas, xunto coa voceira de Educación do BNG no Parlamento Galego Cristina Fernández e o tamén deputado por Ourense Iago Tabarés, rexistraron unha batería de iniciativas na Cámara “para blindar as dúas prazas de profesorado de chinés que hai na actualidade na Escola oficial de Idiomas (EOI) de Ourense e evitar un recorte pola calada da Xunta como xa fixo este curso na EOI da Coruña”.
A formación nacionalista recorda que “Ourense xa tivo que esperar de 2007 a 2012 para implantar a oferta de chinés e agora vemos que a Xunta ameaza esta oferta, a calidade do ensino especializado e mesmo os dereitos laborais de profesorado” e insiste en que “non hai razóns obxectivas para cuestionar dúas prazas que levan funcionando en Ourense a tempo completo desde o curso 2013/2014”.
O BNG recorda que “Na Galiza hai na actualidade 10 docentes de Lingua Chinesa que superaron as probas de estabilización e foron nomeadas o pasado setembro de 2023 funcionarias. Polo tanto deberan estar cubrindo na súa totalidade as prazas de chinés en todas as EOI do País e non se explica que se poña Ourense no punto de mira para precarizar a oferta pois non se están a incluír as dúas prazas de estruturais de chinés da EOI de Ourense no concurso xeral de traslados 2024/2025, tal e como denuncia o profesorado afectado”.
O BNG manifesta que “compartimos a preocupación das docentes. Primeiro, porque non se pode admitir que profesorado con praza que de sen ella e segundo, porque a Xunta xa fixo unha improvisación parecida no CADP de 2024 eaproveitouse a circunstancia de que un funcionario de carreira con destino definitivo na EOI de Vigo estaba de excedencia para prestar servizos noutra Administración pública para suprimir a praza en situación de provisionalidade que quedara na EOI da Coruña”.
Así “no CXT actual, continúase pola senda da improvisación ao deixar unha praza da EOI de Ourense fóra da listaxe de vacantes provisionais, tendo en conta que hai persoal funcionario de carreira sen destino definitivo que corre o risco de non ter praza para o curso 2025/2026 se esa praza da EOI de Ourense, igual de estrutural que as outras que aparecen como vacantes provisionais no CXT, non se inclúe na listaxe”.
Por estes motivos o BNG leva ao Parlamento Galego unha batería de iniciativas para asignar destino definitivo a todas as persoas funcionarias que superaron as probas de estabilidade e que foron nomeadas en 2023 docentes na especialidade de chinés e dar estabilidade ás dúas prazas desta lingua na Escola Oficial de Idiomas de Ourense garantindo a debida planificación e que sexan cubertas.