O Campus de Ourense conta con trinta proxectos de investigación financiados polo Goberno de España
A Universidade de Vigo conta en total con 22 proxectos de xeración de coñecemento e outros 13 de persoal investigador, recibindo para estes últimos unha achega de 1.627.600 euros
O subdelegado do Goberno en Ourense, Eladio Santos, visitou esta semana o Campus de Ourense para coñecer de primeira man dous proxectos de investigación, dos máis de 30, que actualmente se están levando a cabo en Ourense financiados polo Ministerio de Ciencia, Innovación e Universidades.
Dentro do Plan Estatal de Investigación Científica, Técnica e de Innovación, este ministerio vén de conceder axudas a proxectos de xeración de coñecemento e formación de persoal investigador predoctoral asociado a estes proxectos, por un valor total de 654.326.000 euros, distribuídos en catro anualidade, entre 2024 e 2027.
Dentro desta convocatoria, a Universidade de Vigo conta con 22 proxectos de xeración de coñecemento e outros 13 de persoal investigador, recibindo para estes últimos unha achega de 1.627.600 euros.
Os proxectos visitados tratáronse dun de transformación de residuos de biomasa a biohidrógeno e outro da creación dun sistema de inspección ferroviaria adaptativo e intelixente. Durante a súa visita, na que estivo acompañado polo vicerreitor ourensán, Francisco Javier Rodríguez Rajo, o subdelegado destacou de ambos que “están constituídos por equipos que traballan con criterios de sustentabilidade, nun dos casos para o aproveitamento dos recursos existentes, incluso dos residuos, e estando en contacto co tecido empresarial”.
Ademais, Santos lembro que estas achegas son só unha mostra de que “o Goberno de España aposta pola ciencia e a investigación, aportando fondos e financiación. O Goberno confía na ciencia como motor de cambio, progreso e transformación do noso país. Cada investigación e proxecto redunda no benestar da sociedade e fainos máis fortes como país”. Pola contra, asegurou “botar de menos” que o Goberno autonómico “faga un esforzo en inversión en ciencia no Campus de Ourense á altura do Ministerio. Debe implicarse máis, con convocatoria de proxectos científicos e investigación e non con medidas que empobrecen máis á universidade”.
Proxectos de Colaboración Internacional
Dentro desta aposta do Goberno central, o Consello de Ministros vén de aprobar a concesión de 23 millóns de euros para financiar 98 proxectos de investigación españois seleccionados en convocatorias e programas europeos e internacionais, no marco do programa de ‘Proxectos de Colaboración Internacional’ da Axencia Estatal de Investigación, dependente do Ministerio de Ciencia, Innovación e Universidades.
En concreto, concedéronse 123 subvenciones a 57 universidades e centros de investigación de case todas as Comunidades Autónomas para financiar proxectos de investigación en colaboración internacional durante 2025 e 2026.
A Universidade de Vigo está presente nesta convocatoria con 3 proxectos, vencellados ás ciencias agrarias, comunicación e tecnoloxía de materiais, que reciben unha axuda total de 678.000 euros.