O campus de Ourense lidera un proxecto europeo que busca transformar a construción con robótica e dixitalización
O grupo Aerolab da Universidade de Vigo coordina un novo proxecto europeo destinado a revolucionar os procesos de construción e rehabilitación de edificios mediante o uso de robótica avanzada, automatización e tecnoloxías dixitais. A iniciativa, denominada Radiance, conta cun financiamento próximo aos catro millóns de euros a través do programa Horizonte Europa e desenvolverase durante os próximos catro anos, ata agosto de 2029.
O equipo ourensán lidera un consorcio formado por 14 entidades públicas e privadas de oito países —entre eles Alemaña, Finlandia, Francia, Noruega, Polonia, Portugal, Suíza e España— que inclúe universidades, centros de investigación e empresas do sector. Segundo o coordinador do proxecto, Higinio González, Radiance “sitúa a Aerolab e ao campus de Ourense na primeira división europea da robótica”, ademais de abrir novas liñas de investigación en robótica aérea.
O proxecto pretende mellorar a sostibilidade económica, social e ambiental dun sector responsable do 42 % do consumo enerxético e do 35 % das emisións de gases de efecto invernadoiro na UE. Radiance desenvolverá solucións robóticas para inspeccionar, reparar e illar fachadas, drons para limpeza e aplicación de revestimentos, así como sistemas de realidade aumentada e robots autónomos para tarefas de monitorización e apoio en obra.
Estas tecnoloxías validaranse en contornos reais de España, Noruega e Polonia, en edificios de distintos materiais e usos, co obxectivo de reducir custos, tempos e riscos laborais. Con esta iniciativa, a Universidade de Vigo consolídase como un referente europeo en innovación aplicada ao sector da construción e á eficiencia enerxética.