O campus de Ourense presenta o programa de cursos de extensión universitaria para 2025
Este luns presentouse no campus de Ourense a programación dos cursos de extensión universitaria para o verán de 2025, organizados pola Vicerreitoría do campus co apoio da Deputación de Ourense. Nesta edición ofrécense oito cursos que abranguen temas variados, desde o liderado e o termalismo ata a lingua de signos, o ámbito audiovisual ou a igualdade. A matrícula está aberta tanto para a comunidade universitaria como para o público xeral, cun prezo que vai dos 10 aos 50 euros, e con descontos para colectivos vinculados á Universidade de Vigo.
Na presentación participaron o vicerreitor do campus, Francisco Javier Rodríguez, e o deputado de Representación Institucional da Deputación, Rosendo Fernández. Ambos destacaron a colaboración entre ambas institucións e a importancia de achegar esta oferta tamén a concellos como Muíños e Celanova.
Cinco dos cursos son novos nesta edición. Entre eles está Motivando-T: liderado e motivación, que se celebrará na Facultade de Ciencias Empresariais e Turismo do 7 ao 11 de xullo, dirixido por Mónica Legaspi, cun enfoque innovador baseado na intelixencia emocional e social aplicada ao contorno laboral e directivo. Do 14 ao 24 de xullo, na Facultade de Educación e Traballo Social, impartirase outro curso de iniciación á lingua de signos española, coordinado por Breogán Riobóo, que tamén abordará aspectos da cultura xorda e ferramentas socioeducativas inclusivas.
Entre agosto e setembro terá lugar Termalismo: descubrindo Estremadura, Portugal e Galicia, dirixido por José Luis Legido e Elisa Alén, que combinará formación teórica con visitas a balnearios e centros termais desas tres rexións. Xa en setembro e outubro desenvolveranse dous cursos máis na Facultade de Educación e Traballo Social. Un deles, A construción sociocultural do amor romántico en Occidente, coordinado por María Lameiras, abordará esta temática desde unha perspectiva de xénero e multidisciplinar. O outro, Recursos socioeducativos e metodoloxías activas para transformar a educación, estará dirixido por Jesús Deibe e centrarase na aplicación da intelixencia artificial, o traballo por proxectos e outras prácticas innovadoras na aula.
Tres cursos máis repiten respecto a anos anteriores. En Muíños, do 11 ao 13 de xuño, celebrarase Retos actuais e futuros na conservación da biodiversidade, dirixido por María Fernández e María do Carmen Seijo, que tratará temas como a prevención de incendios e a xestión sustentable dos recursos naturais. En Celanova, do 23 ao 27 de xuño, terá lugar unha nova edición do Curso de Medios Audiovisuais, coordinado por Miguel Anxo Fernández e Paulino Pérez, que analizará producións galegas recentes e incluirá o obradoiro práctico Celanova, plató de ficción. Por último, do 25 ao 28 de xuño, desenvolverase Ourense no tempo: historia, arte e tradicións, dirixido por Xosé Ramón Campos, cun percorrido histórico e etnográfico pola provincia, incluíndo visitas a pé por Ourense, Allariz e Valdeorras.
Os cursos teñen entre 30 e 47 horas de duración e están recoñecidos cun crédito ECTS por cada 30 horas de traballo. As prazas dispoñibles oscilan entre 20 e 40, e a inscrición faise a través do Campus Activo da Universidade de Vigo.