O Club Marbel comeza a súa andaina no Europeo de Jiu Jitsu cunha medalla e un quinto posto
O Jiu Jitsu Club Marbel de Ourense comezou con bos resultados a súa participación no Campionato Europeo de Jiu Jitsu que se disputa na illa de Creta (Grecia) entre os días 14 e 21 de marzo. Na primeira xornada de competición, os representantes ourensáns lograron unha medalla de prata e un quinto posto.
Silvia Iglesias e Lucía Caneiro subiron ao podio tras conseguir a medalla de prata na modalidade de Dúo Show Sub 21, un dos primeiros éxitos da expedición ourensá no campionato continental.
Pola súa banda, Leire Carrera acadou a quinta posición na categoría de loita feminina Sub 21 de menos de 57 quilos, quedándose ás portas das medallas nunha competición de alto nivel.
O mestre e adestrador do club, Felipe Iglesias, destacou tras a xornada que a estancia na illa transcorre con normalidade. Segundo explicou, “a tranquilidade impera na illa, pese a posuír unha base da OTAN nun momento de guerra na zona”.
O Club Marbel participa neste campionato cunha expedición histórica formada por dez deportistas, que representarán a Ourense ao longo de toda a semana en distintas categorías. Tras a xornada inaugural, a competición continuará o luns 16 coa participación de Rubén Córdoba en loita sénior (-94 kg).
Posteriormente, o mércores 18 competirán na modalidade de dúo máster (45-49 anos) os actuais bicampións do mundo Felipe Iglesias e Xermán Rodríguez. O xoves 19 será a quenda do dúo sub 16 formado por Carla Seoane e Beatriz Nesi, mentres que a participación ourensá pecharase o sábado 21 co dúo mixto sub 14 integrado por Alicia Pazos e Álvaro Seoane.
Todos os integrantes do equipo lograron a súa clasificación tras situarse en primeira ou segunda posición do ranking nacional nas súas respectivas categorías, o que reflicte o alto nivel competitivo do club ourensán.
O Campionato Europeo celébrase no Heraklion Arena, na cidade de Heraklion, a cuarta máis poboada de Grecia, un recinto con capacidade para máis de 5.000 espectadores que acolle durante estes días a deportistas de toda Europa nunha das principais citas do calendario continental de jiu jitsu.