O Concello de Esgos inicia a súa campaña de recollida de alimentos para estas festas de Nadal
Un ano máis, a Agrupación de Voluntarios de Protección Civil do Concello de Esgos súmase á campaña “Por un Nadal Feliz para tod@s”, organizada polo Voluntariado de Protección Civil de Ourense a favor do Banco de Alimentos de Ourense. Durante os primeiros días de decembro, os voluntarios percorrerán os distintos pobos do municipio para recoller alimentos non perecedeiros.
O luns 1 de decembro visitarán localidades como Pardeconde, Os Pensos, Xaravedra, Fondodevila, Casanova, Melón de Abaixo, Melón de Arriba, Quinta do Monte, Cernada e Arcos. O mércores 3 pasarán por Touza, Meiroás, Guimarás, Alto do Couso, Feirobal, A Meiroá, Calsomiro, Cachamuiña, A Lama, Regueiro, Soutelo, Quinta e Parrocha. Xa o venres 5 acudirán a Gomariz, Lobaces e Vilar de Ordelles. Continuarán o martes 9 en Tarreirigo, Lampazas, A Granxa, Rebordiños, As Campinas, Laioso, Pinto e Achas, e finalizarán o mércores 10 en Porta do Sol, As Vendas, Folgoso e Cabalgada.
Ademais, todas as persoas que queiran colaborar poderán deixar as súas doazóns nos puntos habilitados no Concello, na biblioteca e no supermercado de Esgos. Desde a Agrupación de Protección Civil agradecen de antemán a solidariedade e xenerosidade de todos os veciños e veciñas que participen nesta iniciativa.