O Concello de Ourense peonaliza varias rúas do centro a partir deste venres
O Concello de Ourense porá en marcha a partir deste venres, 26 de decembro, unha nova reorganización do tráfico no centro da cidade con motivo da entrada en vigor da Zona de Baixas Emisións (ZBE) Ourense Centro. A medida suporá a peonalización de seis rúas e tramos urbanos co obxectivo de reducir o tráfico rodado, favorecer a mobilidade peonil e diminuír as emisións contaminantes.
Desde esa data, a rúa Valle Inclán pasará a ser peonil con plataforma única, mentres que Arturo Pérez Serantes quedará completamente reservada ao tránsito a pé. Tamén se eliminará o tráfico no tramo da avenida de Bos Aires comprendido entre a rúa Concordia e Bedoya.
Na contorna do Parque de San Lázaro peonalizaranse varios accesos, como o tramo da rúa Cardeal Quevedo entre o parque e a avenida da Habana, así como a rúa Bedoya entre o propio parque e o cruzamento con Ramón Cabanillas. Ademais, o lateral do Parque de San Lázaro entre a rúa Concello e Bedoya quedará sen circulación, o que implicará unha reorganización das paradas de taxi e autobús.
O Concello lembra que estes cambios forman parte do proceso de implantación da ZBE no centro urbano e recomenda á cidadanía prestar atención á nova sinalización e ás restricións de acceso que entran en vigor desde este venres.