O Concello de Ourense prevé abordar a vindeira semana nun pleno extraordinario a ordenanza do servizo de recollida de lixo
O Concello de Ourense prevé abordar a vindeira semana a ordenanza reguladora do servizo de recollida de lixo nun pleno extraordinario. O goberno municipal ten previsto convocar mañá, sábado, unha sesión extraordinaria para o luns 29 de decembro, ás 9.00 horas.
A orde do día deste pleno incluirá tres puntos. O primeiro deles será o debate da ordenanza do servizo de recollida de lixo. Ademais, someterase á aprobación un convenio de cooperación entre o Concello de Ourense e o Concello de Barbadás en materia de depuración de augas residuais.
O terceiro punto será o recoñecemento extraxudicial de débeda con Viaqua ata o 31 de decembro de 2024, correspondente a unha partida que xa fora aprobada anteriormente en pleno.
Por outra banda, o goberno municipal tamén prevé a celebración dun segundo pleno extraordinario o martes 30 de decembro, previsiblemente ás 13.00 horas, para abordar o recoñecemento extraxudicial de débeda con Ecourense ata o 31 de decembro de 2024, igualmente correspondente a unha partida xa aprobada polo pleno municipal.