O novo mapa de Galicia presentado pola Xunta insiste na viabilidade económica das fusións municipais

A Xuta de Galicia presentou onte no congreso Reforma do Mapa Municipal de Galicia o informe 'A Planta Local Galega', un documento elaborado pola Fundación Juana De la Vega en colaboración coas tres universidades galegas e que valora unha hipotética fusión municipal entre varios concellos de Galicia.

Concretamente, o informe abre a porta a unha posible fusión entre os concellos ourensáns de Nogueira de Ramuín e Pereiro de Aguiar, Alfoz e O Valadouro, en Lugo, Santiago e Teo e Noia en Lousame, na provincia da Coruña, e Sanxenxo e Meaño e a fusión de concellos da comarca do Deza, na provincia de Pontevedra.

Fusións voluntarias

A Xunta insiste en que serán os propios concellos, de forma voluntaria, os que deben decidir os mecanismos máis axeitados de asociacionismo e cooperación intermunicipal -compartindo postos de secretaría, intervención ou tesourería entre varios municipios, agrupacións ou mancomunidades, fusións...- co obxectivo de que a veciñanza teña un acceso igualitario aos servizos con independencia do lugar no que resida e, ao mesmo tempo, se poida facer fronte a desafíos da demografía galega como o avellentamento ou o despoboamento.

O conselleiro de Presidencia, Xustiza e Deportes, Diego Calvo, explicou durante a inauguración do Congreso que as primeiras conclusións amosaron que a cidadanía ten unha predisposición favorable á fusión voluntaria dos concellos con ata un 83%, e considera que a redución do número destes melloraría a súa capacidade de prestación de servizos. A porcentaxe redúcese cando se pregunta polas fusións no propio concello.

Diego Calvo lembrou que a Xunta está a traballar na reforma da Lei de Administración Local de Galicia de 1997 e precisamente as conclusións deste estudo tamén serán tidas en conta na súa elaboración. Coa nova norma, o Goberno galego pretende avanzara cara un municipalismo do século XXI asentado na cooperación, a coordinación e na colaboración con ferramentas que garantan a calidade dos servizos municipais no actual contexto demográfico da comunidade ao prestar, por tanto, especial apoio aos concellos en risco de despoboamento.

Por outra parte, explicou que na viabilidade dos concellos ten moito que ver o financiamento local, polo que aclarou que a súa negociación ten que ir asociada á do financiamento autonómico entre o Goberno central e as comunidades. Para compensar os desfases, a Xunta garante a participación das entidades locais nos orzamentos autonómicos mediante o Fondo de Cooperación Local. Así, este fondo sumado a todas as axudas da Xunta ás entidades locais supera os 602 millóns este ano.

As fusións de Oza-Cesures e Cerdedo-Cotobade como exemplo