O programa provincial “Termalismo con Estrelas” bota a andar con gran éxito de participación
A Deputación de Ourense puxo en marcha hoxe o programa “Termalismo con Estrelas”, unha iniciativa que pretende promover tanto o turismo termal como a gastronomía de excelencia da provincia. O proxecto ofrece a combinación de estancias en balnearios con comidas nos tres restaurantes ourensáns que contan con Estrela Michelin: Miguel González, Nova e Ceibe.
Nesta primeira xornada, os participantes comezarán a súa experiencia no balneario de Laias, onde poderán realizar distintas técnicas termais con revisión médica opcional, antes de trasladarse aos restaurantes para coñecer os menús seleccionados especialmente para este programa piloto.
A resposta á iniciativa foi elevada desde a súa presentación o 25 de febreiro, coas prazas da primeira quenda completamente cubertas. Os participantes proceden de varias comunidades autónomas, incluíndo Galicia, Asturias, País Vasco, Castela-León, Castela-A Mancha e Madrid, o que reflicte o interese pola proposta de combinar termalismo e gastronomía de alto nivel.
A primeira quenda inclúe unha estancia de cinco noites en réxime de pensión completa, acceso ás piscinas de auga mineromedicinal e dez técnicas termais. Cada restaurante escolleu un dos seus menús habituais para respectar a súa esencia gastronómica: Miguel González co menú “Auria”, Ceibe co menú “Enxebre” e Nova co menú que leva o seu propio nome, centrado en produtos locais e frescos.
Tras rematar esta experiencia piloto, os responsables da Deputación, dos balnearios e dos restaurantes avaliarán os resultados para estudar posibles melloras en futuras edicións do programa.