O PSdeG acusa o goberno de Ourense de eliminar a ORA 'a golpe de titular' e de afundir a cidade no caos
O grupo municipal socialista no Concello de Ourense volveu cargar contra a supresión da ORA, unha medida que cualifica de improvisada e sen planificación. Nun comunicado difundido este 2 de xaneiro de 2026, o PSdeG sostén que a eliminación do estacionamento regulado non é 'valentía política', senón unha decisión propagandística que xa está a ter consecuencias nas rúas: máis desorde urbano e máis problemas para milleiros de persoas.
Entre os efectos inmediatos, as edís socialistas poñen o foco na perda da rotación: 'o que antes funcionaba como sistema de rotación converteuse nun aparcamento permanente', advirten, o que ao seu xuízo provoca máis vehículos dando voltas, máis atascos, máis contaminación e máis tempo perdido.
O PSdeG critica tamén que a supresión chegase sen un plan alternativo. Sinalan que se elimina a ORA sen habilitar aparcadoiros disuasorios, sen reforzar o transporte público e sen ofrecer solucións reais para absorber a demanda, o que consideran 'tremendamente irresponsable'.
A desaparición da zona azul entrou en vigor o 1 de xaneiro de 2026, despois de que o alcalde, Gonzalo Pérez Jácome, anunciase o 31 de decembro arredor das 16.00 horas o apagado das máquinas expendedoras de tíckets, deixando na práctica o aparcadoiro libre nas antigas zonas reguladas e sen límite de tempo.
Outro dos puntos de fricción é o impacto sobre o persoal vinculado ao servizo. As socialistas aseguran que segue sen facerse público que ocorrerá cos traballadores e traballadoras, malia preguntar por isto en diferentes xuntas e plenos.
Mentres, medios e colectivos recollen que a medida pode deixar persoas sen emprego e que existe preocupación polo futuro do servizo e polo modelo de mobilidade nun contexto no que tamén se implantou recentemente a Zona de Baixas Emisións.
Por último, o PSdeG denuncia o 'feísmo urbano' derivado dunha execución sen rigor, con parquímetros en desuso, sinais contraditorias e marcas viarias que xa non teñen validez. E conclúe que suprimir a ORA deste xeito deixa Ourense 'ao albor do desorde' e sen alternativas.