O PSdeG critica a aprobación definitiva dos orzamentos de Ourense e acusa ao goberno municipal de ignorar ás alegacións veciñais
O Grupo Municipal Socialista de Ourense manifestou hoxe o seu rexeitamento frontal á aprobación definitiva dos orzamentos municipais, que chegaron ao pleno extraordinario “con alegacións mal tramitadas, rexeitadas de xeito automático ou simplemente silenciadas”. Así o asegurou a voceira socialista, Natalia González, quen subliñou que “Ourense precisa unhas contas serias, transparentes e participativas, e estas non o son. Por iso o noso voto segue a ser un NON rotundo”.
Segundo o PSdeG, as contas promovidas polo goberno local nin respectan os dereitos laborais do persoal municipal, nin apoian o tecido asociativo nin dan resposta ás demandas cidadás. “Trátase duns orzamentos nados sen diálogo, sen negociación e sen transparencia”, insistiu González, lembrando que foron desestimadas as alegacións presentadas por representantes de colectivos sociais e económicos, así como por particulares da cidade.
Entre elas, figuraba a petición dun funcionario para corrixir a descrición do seu posto, rexeitada de maneira automática; a reclamación dun veciño que solicitaba revisar a legalidade da aprobación inicial, desestimada por quen estaba directamente cuestionado; ou a demanda da Asociación de Comerciantes e Industriais da Praza de Abastos para cumprir cos convenios asinados, que segue sen unha resolución clara.
Tampouco se atendeu a alegación da Agrupación Miño, que reclamaba recuperar as partidas de participación cidadá (150.000 euros) e de apoio ao movemento veciñal (120.000 euros). Do mesmo xeito, a denuncia do sindicato CSIF pola ausencia de negociación colectiva e polo incumprimento da Lei de Emprego Público de Galicia permanece sen resposta.
Para os socialistas, todo isto evidencia “a falta de vontade do goberno municipal para dialogar, corrixir erros e dar estabilidade a sectores clave da cidade”.