O PSdeG de Toén considera “inadmisible” subida salarial do concelleiro de infraestruturas
O PSdeG-PSOE de Toén pon de manifesto a súa “total” oposición á subida aprobada polo goberno municipal en pleno para que o concelleiro da área de servizos públicos e infraestruturas pase a cobrar 32.436,46 euros anuais. As e os socialistas consideran que “é inadmisible” este aumento, que supón un incremento de 7.498,71 euros ao ano con respecto ao que viña cobrando dende xuño de 2023, e acusan ao PP de “baleirar as arcas municipais para encher os petos do equipo de goberno”.
Dende o grupo municipal socialista afirman que o actual equipo de goberno, encabezado polo alcalde, Ricardo González, “ten como única prioridade para Toén encher aínda máis os seus petos a costa dos cartos públicos”. Neste senso as e os socialistas critican que s suba das contías correspondentes a pagos ao equipo de goberno suporán neste 2025 11.500 euros máis con respecto ao curso pasado.
O voceiro do PSdeG-PSOE en Toén, Antonio Fernández Feijóo, explica que o alcalde “está actualmente no TOP-5 de alcaldes mellor pagados da provincia, concretamente no segundo posto e por diante de alcaldes de concellos moito máis grandes e con moitos máis habitantes”. O edil socialista destaca tamén que “o aumento da dedicación exclusiva ao concelleiro de servizos públicos e infraestruturas supón que o gasto se dispare aínda máis pasando de supor 24.937,75 euros as arcas municipais en 2024 a ser de 32.436,46 euros”.
“Non entendemos a postura do PP que namentres se opón a subida do salario mínimo interprofesional, aposta por subir os soldos dos seus cargos públicos”, pon de manifesto Fernández Feijóo. Para o voceiro socialista esta “é unha proba máis de que ao goberno municipal do Partido Popular non lle interesa a veciñanza e só miran por eles mesmos, preocupándose máis de subirse os soldos de atender as necesidades da veciñanza”.
Dende o PSdeG-PSOE de Toén instan ao goberno local a “deixar de empregar os cartos públicos para pagar soldiños e a centrarse nos problemas reais de Toén”. Neste senso tamén poñen de manifesto que o municipio “precisa de planificación e non dun goberno local que funciona por pura improvisación, que ningunea a oposición e que non escoita as reclamacións da veciñanza”.